තියුණු ආයුධයකින් ගෙල කපා රූමත් කාන්තාවක නිදියහනේම මරා දමා තිබියදී වත්තල පොලිසිය මගින් ඊයේ (27 දා) උදෑසන සොයාගෙන තිබේ. මෙසේ මරණයට පත්වී ඇත්තේ අංක 56/ A, මුතුරාජ මාවත සාන්ත සෙබස්‌තියන් පටුමග මාබෝල වත්තල ලිපිනයේ පදිංචිව සිටි ශ්‍රියානි රණවීර (44) නමැති තිදරු මවකි.
පළමු විවාහයෙන් වෙන්වී මීට වසර 1 1/2 කට පෙර ව්‍යාපාරිකයකු සමග විවාහ වී ඇති මෙම කාන්තාවට පළමු විවාහයෙන් දරුවන් තිදෙනෙක්‌ වෙති. ඇගේ එක්‌ පුත්‍රයකු මීට මාස දෙකකට පෙර අනතුරකින් මියගොස්‌ ඇත. දෙවන ස්‌වාමිපුරුෂයා සමග ජීවත්වී ඇති ඇය පෙරේදා (26 වැනිදා) රාත්‍රි සැමියා සමග නින්දට ගොස්‌ තිබේ. සිද්ධිය වන අවස්‌ථාවේ ඝාතනයට ලක්‌වූ කතගේ මවද වැඩිමල් දියණිය හා ඇගේ කුඩා දරුවා ද නිවසේ සිට ඇත. උදෑසන නිවැසියන් සෝදිසි කිරීමේදී ගෙලේ විශාල කැපුම් තුවාලයක්‌ සහිතව නිදි යහන මත ඇය මියගොස්‌ සිට ඇත. ඒ අවස්‌ථාවේ සිට දෙවැනි ස්‌වාමිපුරුෂයා අතුරුදන්ව ඇති අතර මෙම ඝාතනය සිදුකරන්නට ඇත්තේ ඔහු බවට සැකකරන පොලිසිය ඔහු අත්අඩංගුවට ගැනීමට පරීක්ෂණ ආරම්භ කර ඇත.
සිද්ධිය සිදුවූ ස්‌ථානයට පැමිණි වත්තල මහෙස්‌ත්‍රාත් මංජුල රත්නායක මහතා මහෙස්‌ත්‍රාත් පරීක්ෂණය පවත්වා පශ්චාත් අධිකරණ වෛද්‍ය පරීක්ෂණය සිදුකිරීමට නියෝග කරන ලදී.
සිද්ධිය වූ ස්‌ථානයට විශේෂ පොලිස්‌ අපරාධ (SධC) අංශයේ නිලධාරීන්ද ඇඟිලි සටහන් දෙපාර්තමේන්තු නිලධාරීන්ද පැමිණ පරීක්ෂණ පවත්වන ලදී.
කැලණිය කොට්‌ඨාස භාර ජ්‍යෙෂ්ඨ පොලිස්‌ අධිකාරි මහේෂ් පෙරේරා මහතාගේ උපදෙස්‌ මත කැලණිය (2) සහකාර පොලිස්‌ අධිකාරි ආනන්ද අල්විස්‌ මහතාගේ මෙහෙයවීමෙන් වත්තල පොලිස්‌ ස්‌ථානාධිපති ප්‍රධාන පොලිස්‌ පරීක්ෂක ඉන්දික ලොකුහෙට්‌ටි මහතා විසින් සැකකරු අත්අඩංගුවට ගැනීමට කටයුතු යොදා තිබේ.
Source: Divaina (Sri Lanka)