තායිලන්තයේ බැංකොක්‌ නගරයේ සුපිරි හෝටලයකදී ගැටුමක්‌ ඇතිකරගත් ශ්‍රී ලාංකික ව්‍යාපාරිකයන් 16 දෙනකු එරට පොලිසිය මගින් අත්අඩංගුවට ගෙන පෙරේදා (2 වැනිදා) පිටුවහල් කර ඇත.
පිටුවහල් කිරීමෙන් පසු ශ්‍රී ලංකාවට පැමිණි ව්‍යාපාරිකයන් පිරිස කටුනායක ගුවන් තොටුපළ රහස්‌ පොලිස්‌ ඒකකය මගින් රඳවාගෙන ප්‍රශ්න කිරීමෙන් පසු මුදාහැර තිබේ.
මෙම ගැටුමට සම්බන්ධ වූ තවත් ශ්‍රී ලාංකිකයන් පිරිසක්‌ ඉකුත් දෙසැම්බර් මස 26 වැනිදා තායිලන්තයෙන් පිටුවහල් කර තිබිණි. මෙම ව්‍යාපාරිකයන් ඇතුළු ශ්‍රී ලාංකිකයන් බැංකොක්‌ නගරයේ සුවිසල් නිවසක නවාතැන්ගෙන සිටි අතර ඔවුන් ඉකුත් 21 වැනිදා රාත්‍රි සුපිරි හෝටලයකදී ගැටුමක්‌ ඇතිකර ගෙන තිබිණි.
මෙම සිද්ධිය පිළිබඳව පූර්ණ විමර්ශනයක්‌ කළ තායිලන්ත පොලිසිය ගැටුමට සම්බන්ධ වූ සියලුම ශ්‍රී ලාංකිකයන් රටින් පිටුවහල් කිරීමට කටයුතු කර ඇත. (හේමන්ත රන්දුණු)
Source: Divaina (Sri Lanka)