අවිස්‌සාවේල්ල මූලික රෝහලේ සුළු සේවිකාවක විසින් දින පහක්‌ වයසැති කිරිකැටි බිළිඳියක රුපියල් ලක්ෂ දෙකකට විකිණීමට ගෙනයමින් සිටියදී අවිස්‌සාවේල්ල පොලිසිය විසින් සැකකාරිය සමඟ බිළිඳිය ඊයේ (10 වැනිදා) දහවල් අත්අඩංගුවට ගෙන තිබේ.
ජාතික ළමාරක්‍ෂක අධිකාරිය මගින් කළ දැනුම්දීමකට අනුව අවිස්‌සාවේල්ල පොලිස්‌ නිලධාරීන් විසින් දරුවා සමඟ සැකකාර කාන්තාව මෙලෙස අත්අඩංගුවට ගෙන ඇත.
මෙම දරුවාගේ මව සීතාවක කර්මාන්තපුරේ සේවිකාවක බවත් ඇය දැරණියගල ප්‍රදේශයේ පදිංචි තැනැත්තියක බවත් පොලිසිය කළ පරීක්‍ෂණවලදී හෙළිවී තිබේ.
මෙම දරුවා මිලදී ගැනීමට ඊයේ (10 වැනිදා) උදෑසන අවිස්‌සාවේල්ල නගරයට ආසන්න ස්‌ථානයකට ගනුදෙනුකරුවන් කිහිපදෙනකු පැමිණ ඇති අතර ඒ අය දරුවා මිලදී නොගන්නේ නම් මැදපෙරදිග රටකට විකිණීමට තීරණය කර සිටි බව සැකකාරිය පොලිසියට පවසා ඇත.
සීතාවක සහකාර පොලිස්‌ අධිකාරි ඒ. ඇතුලත්මුදලි මහතාගේ සහ අවිස්‌සාවේල්ල මූලස්‌ථාන පොලිස්‌ පරීක්‍ෂක ලලිත් පුස්‌වැල්ල මහතාගේ උපදෙස්‌ මත පොලිස්‌ කාන්තා කාර්යාංශ නිලධාරීන් වැඩිදුර පරීක්‍ෂණ ආරම්භ කර තිබේ. (ඡේ. ඒ. සී. ශාන්ත කුමාර සහ එල්.වී. සමරසිංහ අවිස්‌සාවේල්ල)
Source: Divaina (Sri Lanka)