බ්‍රිතාන්‍යයේ දෙවැනි එළිසබෙත් මහ රැජන ශ්‍රී ලංකාවේ පැවැත්වෙන පොදු රාජ්‍ය මණ්‌ඩලීය රාජ්‍ය නායක සමුළුවට අනිවාර්යයෙන්ම සහභාගි වන බව පොදු රාජ්‍ය මණ්‌ඩලයේ මහ ලේකම් කමලේෂ් ෂර්මා මහතා ඊයේ (12 දා) තහවුරු කර ඇත.
පොදු රාජ්‍ය මණ්‌ඩලීය රාජ්‍ය නායක සමුළුව ලබන නොවැම්බර් මාසයේ කොළඹ පැවැත්වෙන බවද ඒ සඳහා මහ රැජන අනිවාර්යයෙන්ම සහභාගි වන බවද නියෝජ්‍ය කථානායක චන්දිම වීරක්‌කොඩි මහතා හමුවේ ෂර්මා මහතා ඊයේ පවසා තිබේ.
තෙදින නිල සංචාරයක්‌ සඳහා දිවයිනට පැමිණ සිටින මහ ලේකම් කමලේෂ් ෂර්මා මහතා ඊයේ පාර්ලිමේන්තුවේදී චන්දිම වීරක්‌කොඩි මහතා හමුවී සාකච්ඡා කර ඇත. හෙතෙම දිවයිනට පැමිණියේ කොළඹදී පැවැත්වෙන පොදු රාජ්‍ය මණ්‌ඩලීය රාජ්‍ය නායක සමුළුවේ සංවිධාන කටයුතු පිළිබඳ මූලික සාකච්ඡා පැවැත්වීම සඳහාය.
පොදු රාජ්‍ය මණ්‌ඩලයේ නායිකාව වන්නේ බ්‍රිතාන්‍යයේ කිරුළ හිමි දෙවැනි එළිසබෙත් මහ රැජනයි.
Source: Divaina (Sri Lanka)