ඉන්දීය ප‍්‍රධානතම විස්සයි20 ක‍්‍රිකට් තරගාවලියට (අයි.පී.එල්.) සහභාගි වීමට නියමිතව සිටි ශ්‍රී ලංකා ක‍්‍රීඩකයන් 13 දෙනා අතරින් චෙන්නායි සුපර් කිංග්ස් පිල නියෝජනය කිරීමට නියමිතව සිටි නුවන් කුලසේකර සහ අකිල ධනංජය තරගාවලියට සහභාගි වන බවට අද (01) පස්වරුව දක්වා ශ්‍රී ලංකා ක‍්‍රිකට් ආයතනයට දක්වා නොතිබුණි.
දිල්ලි ඩෙයාර්ඩෙවිල්ස් සහ පූනේ වෝරියස් යන කණ්ඩායම්වලින් මෙවර තරගාවලියට සහභාගි වන ලෙස චන්දිමාල්ගෙන් කළ ඉල්ලීම් ඔහු ප‍්‍රතික්ෂේප කර තිබේ.
තරගාවලියට සහභාගි වන බව සෙසු ක‍්‍රීඩකයන් 11 දෙනා මේ වන විටත් ශ්‍රී ලංකා ක‍්‍රිකට් ආයතනයට දැනුම්දී තිබේ.
ශ්‍රී ලංකා ක‍්‍රිකට් ආයතනයේ ප‍්‍රධාන විධායක නිලධාරී ඈෂ්ලි ද සිල්වා මහතාගෙන් මේ පිළිබඳව කළ විමසුමේදී පැවසුවේ දිනේෂ් චන්දිමාල්, නුවන් කුලසේකර සහ අකිල ධනංජය යන ක‍්‍රීඩකයන් මේ දක්වා තරගාවලියට සහභාගි වන බවට ලිඛිතව දැනුම්දී නොමැති බවයි.
‘‘අයි. පී. එල්. තරගාවලියට සහභාගි වන සෙසු ක‍්‍රීඩකයන් ඒ පිළිබඳ ලිපියක් මගින් ක‍්‍රිකට් ආයතනයට දැනුම්දී තිබෙනවා. නමුත් චන්දිමාල්, කුලසේකර සහ අකිල මේ දක්වා ලිපි යොමුකර නෑ’’ යැයි ඈෂ්ලි ද සිල්වා මහතා වැඩි දුරටත් පැවසීය.
ශ්‍රී ලංකා ක‍්‍රීඩකයන්ගේ ආරක්‍ෂාව පිළිබඳ සම්පූර්ණ වගකීම තමන් දරණ බවට ඉන්දීය ක‍්‍රිකට් පාලක මණ්ඩලය ශ්‍රී ලංකා ක‍්‍රිකට් ආයතනයට දැනුම්දී ඇතැයි මේ පිළිබඳව කළ විමසුමකදී ශ්‍රී ලංකා ක‍්‍රිකට් ආයතනයේ ලේකම් නිශාන්ත රණතුංග මහතා පැවසීය.
මෙවර තරගාවලියේදී මහේල ජයවර්ධන (දිල්ලි), කුමාර් සංගක්කාර (හයිඞ්ට‍්‍රබාත්) සහ ඇන්ජලෝ මැතිව්ස් (පූනේ) ශ්‍රී ලංකා ක‍්‍රීඩකයන් නායකයන් ලෙස කටයුතු කරති.
ජීවන් මෙන්ඩිස්, (දිල්ලි), සචිත‍්‍ර සේනානායක (කොල්කටා), ලසිත් මාලිංග (මුම්බායි), අජන්ත මෙන්ඩිස් (පූනේ), කුසල් ජනිත් පෙරේරා (රාජස්තාන්), තිලකරත්න ඩිල්ෂාන් සහ මුත්තයියා මුරලිදරන් (බැංගලෝර්) සහ තිසර පෙරේරා (හයිට‍්‍රාබාත්) අයි. පී. එල්. තරගාවලියට සහභාගි වන සෙසු ක‍්‍රීඩකයෝ වෙති.
Source: Lankadeepa (Sri Lanka)
