ශ්රී ලංකාව සහ බංග්ලාදේශය අතර තරග තුනකින් සමන්විත එක්දින ක‍්‍රිකට් තරගාවලියේ සූරියවැව මහින්ද රාජපක්‍ෂ ජාත්‍යන්තර ක‍්‍රිකට් ක‍්‍රීඩාංගණයේදී අද (25) පැවැති දෙවැනි තරගය වර්ෂාව හේතුවෙන් අතහැර දැමීමට සිදුවිය.
ශ්රී ලංකා පිල පළමු තරගයෙන් කඩුලූ 8 ක ජයක් ලබමින් 1-0 ක් ලෙස තරගාවලියේ පෙරමුණේ පසු වෙයි.
වර්ෂාව ඇද හැළීමෙන් පස්වරු 2.55 ට පමණ තරගය තාවකාලිකව අත්හිටුවන විට පළමුව පන්දුවට පහර දෙමින් සිටි ශ්රී ලංකා පිල ඕවර 5 ක් අවසානයේ කිසිවකු නොදැවී ලකුණු 33 ක් රැස්කර සිටියේය.
එතැන් සිට වරින් වර වර්ෂාව ඇද හැලූණු අතර පස්වරු 5.10 ට පමණ වර්ෂාව දැඩි වූ අතර එම වාර්ෂාව පස්වරු 6.45 දක්වා අඛණ්ඩව පැවතීම නිසා තරගය අතහැර දැමීමට විනිසුරුවෝ තීරණය කළහ.
බංග්ලාදේශ නායක මුෂ්ෆිකුර් රහීම් කාසියේ වාසිය ලබා පළමුව පන්දුවට පහරදීමට ශ්රී ලංකා පිලට ආරාධනා කළේය.
ශ්රී ලංකා ආරම්භක පිතිකරුවන් යුගළ වන කුසල් ජනිත් සහ තිලකරත්න ඩිල්ෂාන් පළමු තරගයේ මෙන්ම වේගවත් ආරම්භයකට පිවිසෙමින් 5 වැනි ඕවරය අවසන් වන විට ලකුණු 33 ක් රැස්කිරීමට සමත් වූහ.
කුසල් ජනිත් පන්දු 21 කදී හතරේ පහර තුනක් සමගින් නොදැවී ලකුණු 18 ක් ද, තිලකරත්න ඩිල්ෂාන් පන්දු 9 කදී හතරේ පහරක් සමගින් නොදැවී ලකුණු 10 ක් ද, ලබා සිටියහ.
දෙරට අතර තෙවැනි සහ අවසන් එක්දින ක‍්‍රිකට් තරගය මේ මස 28 වැනි මහනුවර පල්ලෙකැළේ ජාත්‍යන්තර ක‍්‍රිකට් ක‍්‍රීඩාංගණයේදී දිවා/රාත‍්‍රි තරගයක් ලෙස පැවැත්වීමට නියමිතය.
Source: Lankadeepa (Sri Lanka)