ශ්‍රී ලංකා එක්දින ක‍්‍රිකට් පිලේ නායකයා ලෙස විස්සයි20 පිලේ නායකයා ලෙස කටයුතු කරන ඇන්ජලෝ මැතිව්ස් පත්කර තිබේ. එම කණ්ඩායම් දෙකේම උප නායකත්වය යොවුන් පිතිකරු දිනේෂ් චන්දිමාල්ට හිමිව තිබේ.
ටෙස්ට් පිලේ නායකයා සහ උප නායකයා පත්කිරීම කල්දමා තිබේ. ටෙස්ට් සහ එක්දින කණ්ඩායම් දෙකට නායකයා බැගින් දෙදෙනකු පත්කළ යුතු බවට මේ වන විට මතයක් නිර්මාණය වී තිබීම මෙම කල්දැමීමට හේතුව බව වාර්තා වේ.
ඕස්ටේ‍්‍රලියාවේදී ඊයේ (28) අවසන් වූ දීර්ඝ සංචාරයෙන් පසු හිටපු නායක මහේල ජයවර්ධන නායකත්වයෙන් ඉල්ලා අස්වීමෙන් ටෙස්ට් සහ එක්දින යන කණ්ඩායම් දෙකේම නායකත්වය පුරප්පාඩු විය.
ශ්‍රී ලංකාවේදී පසුගිය වසරේ සැප්තැම්බර් මස අවසන් වූ විස්සයි20 ලෝක කුසලාන තරගාවලියේ අවසන් මහ තරගයේ පරාජයෙන් පසු මහේල විස්සයි20 නායකත්වයෙන් ඉවත් වීමෙන් අනතුරුව ඇන්ජලෝ මැතිව්ස් විස්සයි20 නායකත්වයට පත්කළේය.
වසරකට අධික කාලයක් උප නායකත්වය දැරූ 25 හැවිරිදි ඇන්ජලෝ මැතිව්ස් ටෙස්ට් තරග 31 කට සහ එක්දින තරග 90 කට ක‍්‍රීඩා කර තිබේ. ශ්‍රී ලංකා වයස 19 න් පහළ පිලේ නායකයා ලෙස ද කටයුතු කළ 23 හැවිරිදි දිනේෂ් චන්දිමාල් ටෙස්ට් තරග 5 කට සහ එක්දින තරග 50 කට ක‍්‍රීඩා කර තිබේ.
Source: Lankadeepa (Sri Lanka)