අන්තර්ජාතික මට්ටමේ ක‍්‍රීඩකයකුට නොගැලපෙන ආකාරයට මාධ්‍යවේදීන් හමුවේ හැසිරුණු බවට චෝදනා එල්ලවී සිටින ශ්රී ලංකා ක‍්‍රිකට් පිලේ වේග පන්දුයවන ක‍්‍රීඩකයකු මෙන්ම විස්සයි20 පිලේ උප නායක ලසිත් මාලිංග පිළිබද වාර්තාව අනිද්දා (09) ශ්රී ලංකා ක‍්‍රිකට් ආයතනයේ විධායක කමිටුවට ඉදිරිපත් කිරීමට නියමිත බව වාර්තා වේ.
මාලිංගගේ හැසිරීම පිළිබදව ශ්රී ලංකා ක‍්‍රිකට් ආයතනය එහි ප‍්‍රධාන විධායක නිලධාරියාගෙන් කැදවූ වාර්තාව මේ වන විට ක‍්‍රිකට් ආයතනයේ ලේකම්වරයාට යොමුකර ඇති බව වාර්තා වේ.
මේ පිළිබදව ‘ලංකාදීප’ කළ විමසුමකදී ශ්රී ලංකා ක‍්‍රිකට් ආයතනයේ ප‍්‍රධාන නිලධාරියකු පැවසුවේ ප‍්‍රධාන විධායක නිලධාරියාගේ වාර්තාව මේ වන විට ලැබී ඇති බවත් එය අනිද්දා (09) පස්වරුවේ පැවැත්වීමට නියමිත විධායක කමිටුවට ඉදිරිපත්කිරීමට නියමිත බවත්ය.
වාර්ෂික ගිවිසුම පිළිබද ශ්රී ලංකා ක‍්‍රිකට් ආයතනයේදී පසුගිය 3 වැනිදා රාත‍්‍රි පැවැති සාකච්ඡවට සහභාගිවීමෙන් පසුව සහ පසුදින (04 වැනිදා) වාර්ෂික ගිවිසුමට අත්සන් තැබීමට පැමිණි අවස්ථාවේදී මාලිංග මාධ්‍යවේදීන්ට පහත් ලෙස ප‍්‍රතිචාර දැක්වීම පිළිබදව විනය පියවර ගැනීමට ශ්රී ලංකා ක‍්‍රිකට් ආයතනය පෙරේදා (05) තීරණය කළේය.
Source: Lankadeepa (Sri Lanka)
